Tag: festa di Piedigrotta

L’angolo della Poesia

A Piererotta

‘A sera ‘e Piererotta, ‘a int’ ‘e Lanzière,

‘A copp’ a na ventina ‘e palazzuole,

Vestute comme jeveno ‘e guarriere,

Partettero aunite; e a ccapa lista

Nce jeva ‘o figlio ‘e Rosa ‘ncopp’  ‘o ciuccio,

Cu nu castiello ncapo, ‘e cartapista.

Passajeno pe’ Tuleto, passe passe,

Sunanno trummettelle e siscarielle,

Tammore, putipù e scetavajasse.

Quann’arrivajeno nnant’ ‘o “Cambrinusso”

Fermàjeno e se cantajeno quatto vote

Na canzuncella ‘e Ferdinando Russo…

Ma quanno fuje vicino Piererotta

Penzajeno ‘e fa na guerra; e dopp’  ‘a guerra

Chiù d’uno se truvaje c’ ‘a capa rotta…

Currettero mazzate… quacche cosa

Peggio d’  ‘o Quarantotto! Pur’  ‘o ciuccio

Avette ‘a parta soja; e ‘o figlio ‘e Rosa,

Pe mezzo ‘e nu crisuommolo int’  ‘e rine,

Fuje carriato int’ a na carruzzella,

‘E pressa ‘e pressa, ‘ncopp’ ‘e Pellerine.

‘O rieste se turnajeno int’  ‘e Lanziere

‘e na manera ca, a vvederle sulo,

Parevano ‘a zuzzimma d’  ‘e guarriere!

P. Ponzillo